"आठवणींची शाळा"

"आठवणींची शाळा"
आम्ही मित्रांनी एकदा ठरवले,आठवणींची भरवावी शाळा …. 
आणि बघता बघता अख्खा,सातवीचा वर्ग झाला गोळा….
बारा मुलगे चार मुली मिळून,तेव्हाचा पट अवघा सोळा…. 
एक मित्र सोडून गेला,उरलेल्या पंधरांचाच भरला मेळा…. 
वनभोजनाची टूम निघाली,वर्गणी म्हणून काजू झाले गोळा….
तागडीवर नीट लक्ष देवूनही,हातावर पडले रुपये दोनशे सोळा….
एवढ्याने वनभोजन होणार कसे,सर्वांच्या पोटात उठला गोळा….
मग कुणी तांदूळ,कुणी पीठ,पातेलं,कढई तर कोणी आणला पळा….
वर्गणीचे पैसे देवून मग,उरलेला बाजार भरला सगळा….
सामानसुमान घेऊन सर्वांनी,गाठला तळयाखालचा मळा….
मुली म्हणाल्या,चूल पेटवून मुलांनो,भात तितका वाळा….
मग हवं तर आधीसारखं,पण न भांडता,विटी दांडूने खेळा……
मुलीनो,हवंतर "ओबामा" वर बोला,पण सासवांचे विषय टाळा……
एखादीने गाणं छानसं म्हणा,जिचा खरंच चांगला गळा ….
वरण झाले पातळ,पर्याय म्हणून वरचे पाणी गाळा……
वडे राहिले कच्चे,त्यांना पुन्हा कढईत सोडून तळा….
पुरणार नाहीत वाटतात,थोडंस आणखी पीठ मळा…
खूप झाली चेष्टामस्करी,एकमेकांचा चुकवून डोळा….
तीस वर्षानंतरही सर्वांमध्ये दिसला,पूर्वीचाच लळा…
असा घेतला एक दिवस,अख्ख्या वर्गाने "श्वास" मोकळा……
आणि तिथेच सापडला तो हरवलेला पूर्वीचा "आनंद"वेगळा….